دكتورة دينا المصري تكتب: حاجات عبيطة

البنات اللي بيتضحك عليها ببوكية ورد أو عزومه فمطعم شيك، اوعوا تاخدوا الحاجات العبيطة دي مقياس للاهتمام أو للحب، تعرفي إزاي إن الراجل عاوزك فعلاً وبيحبك؟ باختصار (بالأفعال)، الراجل حُبه مش بيبان ف ورد او كلام حلو، الراجل بيبان من وقفته معاكي لما تمري بأزمة.

لما يفضل يسألك مرة وعشرة عملتي أيه فالحوار الفلاني وميزهقش، لما تلاقيه بيقولك حلول وبيساعدك مش بالكلام بس، لما تلاقيه في أي مشكلة سواء أنتي اللي غلطانة أو هو بيحاول يصلح الدنيا عشان ميعرفش يقعد يوم واتنين من غيرك، اعرفي إنك مع راجل مسئول وحكيم لو عمل عكس كده يبقى طفل وبيتسلي بيكي وحتى لو مش بيتسلى هايرهقك.

أكتر حاجة عزيزة على الراجل فلوسه لما يعرف إنك محتاجة فلوس هو أول واحد هيقف جانبك ومستحيل يوافق إنك تطلبي من حد غيره حتى لو مش معاه هيتصرف، الراجل صياد وممكن يسافرلك الصين لو عاوز يجيبك مش شرط يكون مهتم بيكي ممكن يبقي في غرض معين فدماغه ومش هيرتاح غير لما يطوله، فالحالة دي قفلي عليه الدنيا كلها ومتخليهوش يطولك وقتها شوفي تصرفاته معاكي بقت إزاي زهق ولا لسه شاريكي، مفيش واحد مهتم بواحدة هيقعد طول اليوم مش بيكلمها مش بيعرف هي فين ولا جاية منين، عزيزتي الست الراجل اللي ميعرفش حاجة عنك فكك منه ده عنده حاجات أهم منك.

متتخدعوش بالهدايا اللي في البدايات والكلام والمقابلات الكتير، الكلمة اللي بتطلع من بوق الراجل بتبقى وعد، الواحد بقى بيشوف أشباه رجال حقيقي والأصعب البنات اللي بتصدق اللعبة اللي بتتعمل، قالك كلام حلو وجاب ورد وموقفش جانبك ولا ساعدك ولا فكر معاكي ولا بيسأل عليكي يبقي تعملي عليه.

ورسالة للراجل: مش كل الستات غبيه وبيقعوا فالفخ أوقات كتير انتوا اللي بتقعوا في الفخ ومش فاهمين كفاية إنك بقيت فنظرها مش راجل.

الكاتبة والمحررة الإعلامية الدكتورة دينا المصري