أبو الليف يشكو من جحود الوسط الفني: فين المبادئ والقيم والأخلاق والدين الإسلامي؟

أعرب الفنان نادر أبو الليف، عن استيائه من زملائه داخل الوسط الفني، لعدم تقديمهم واجب العزاء في وفاة شقيقه الذي رحل عن عالمنا خلال الأيام الماضية، مؤكدًا إنه يقف إلى جانب الجميع في أزماتهم ولم يتلقى أي مقابل معنوي في الوقوف بجانبه.

وقال نادر أبو الليف، في تصريحات خاصة : محدش جالي من النقابة لتقديم واجب العزاء في شقيقي غير المستشار القانوني علاء عامر، والنقيب السابق محمد المحلاوي، والمتعهد محمد رفاعي، وأيضا الفنان سعيد مختار.

وعن تقديم النقيب مصطفى كامل واجب العزاء، قال نادر أبو الليف: النقيب مصطفى كامل بعتلي رسالة تعزية على الهاتف، ولم يحضر العزاء أو الجنازة، ولكن محمد رفاعي، دايمًا مشكورًا يسأل عليا ويكلمني بدون مقابل ومفيش بينا شغل.

نادر أبو الليف: الدين معاملة

واستكمل أبو الليف: الوسط الفني لا يقف إلى جانب أحد في أزماته سواء كانت مرض أو وفاة، معلقًا: محدش من الوسط بيقف جنب حد كله بيقول يلا نفسي.

وواصل أبو الليف حديثه قائلًا: مفيش دلوقتي حد بيقف جنب حد، مبقاش في حاجة اسمها ده صاحبي وكلت معاه عيش وملح، وعنده ظروف لأزم أقف جنبه، أو يكون في بينا ود، أنا كنت بروح للكل في كل مكان ودايمًا بكون موجود سواء في عزاء أو فرح لدرجة إني ورحت شرم والغردقة وبورسعيد ما كل دي أزمات لازم أبقى جنب زمايلي وأشوفهم محتاجين إيه.

نادر أبو الليف: أنا مش عايز حاجة من حد غير السؤال

وأضاف نادر أبو الليف: أنا مش عايز حاجة من حد غير السؤال، نحس إننا بني أدمين، في إحساس ببعض بنحب بعض ونخاف على بعض، ونقف جنب ونواسي بعض فين ده، فين المبادئ والقيم والأخلاق والدين الإسلامي والضمير، فين المودة والرحمة والأخوة مبقاش في الكلام ده دلوقتي للأسف.

واختتم أبو الليف حديثه قائلًا: هو أنا لما بقف جنب حد بيكون عشان حد كاسر عيني مثلا محتاج له في حاجة، الدين معاملة فكما تدين تدان والدنيا سلف ودين.