ميار الببلاوي: مقصدتش أركب التريند بشتيمة الناس ليا.. ونفسيتي تعبت وجالي اكتئاب

ردت الفنانة ميار الببلاوي، على الانتقادات التي تعرضت لها بعد تصريحاتها الأخيرة في أحد البرامج التليفزيونية التي هاجمت فيها الفنانة نشوى مصطفى والفنانة نجلاء فتحي.

ميار الببلاوي تدافع عن نفسها

وكتبت ميار الببلاوي، منشورًا عبر حسابها الشخصي بموقع التواصل الاجتماعي فيسبوك، وقالت: أنا مش هدافع عن نفسي ومش هقول إني صح بس ربنا شاهد إني بتكلم بعفوية ومبعرفش اتخابث، ولا قصدي أي إساءة لأي حد من زملائي اللي بحبهم وبقدرهم وبعتز بأي عمل شاركتهم فيه طوال السنين اللي فاتت، وأنا لا عاوزة أجيب سيرة الفيلم ولا المشهد ولا يشرفني ونفسي أنسى.

منشور ميار الببلاوي

وأضافت ميار الببلاوي: والناس تنسى بس معرفش ليه بعد 25 سنة بينبشوا في الماضي، فيه فنانات عاملين مئات الأفلام وفيها مشاهد نسأل الله المغفرة، اشمعنى ميار اللي لازم تترجم وتتبهدل، وكل اللي عاوز يعمل شو يبقى عليا أنا برفض كل يوم مقابلات في برامج لكن مروة صبري أخت زميلتي عبير وبحبهم هما الاثنين، غير كده أنا حرمت أي مقابلة غير لما أعرف طبيعة الأسئلة وهركز في كل كلمة ومش هذكر أسماء ولا مواقف، بس الصحفيين واليوتيوبرز يرحموني من العناوين اللي ملهاش علاقة بالكلام اللي جوه الفيديو.

واختتمت الببلاوي: بالنسبة للتريند اللي أنا عاوزة أركبه حد الله إني أركب التريند بشتيمة الناس ليا، وعلشان أأكدلكم أنا محولة موبايلي ومبردش على أي صحفي، أنا نفسيتي تعبت وجالي اكتئاب وابني مضايق جدًا، وأختي كده كفاية وبالنسبة لأني بعمل كده علشان أنا اتنسيت وعندي حب للظهور، قولوا اللي يعجبكم، أنا ناجحة في برنامجي ولله الحمد، وراضية بيه، ولو جالي شغل فده رزق أشكر عليه ربنا، مجاليش مش هلجاء للطرق الرخيصة دي علشان أشتغل، وبالنسبة للميكب والرموش والضوافر.. حاضر هطلعلكم زومبي علشان أبقى كده واجهة للحجاب، دا كل اللي عندي وأفوض أمري إلى الله، إن الله بصير بالعباد.