دكتورة دينا المصري تكتب: كتاتونيا

من أبشع وأصعب الأمراض النفسية مرض اسمه "Catatonia كتاتونيا"، ملخص المرض دا إنه قرار، شخص فقد الإحساس بالأمان في بيته؛ مع أهله؛ وحتى أصحابه، في الشارع والشغل وفي كل مكان بيروحه، في الوقت دا عقل الشخص دا بياخد قرار غريب جدا وهو إنه يرجع بالزمن لورا، يفضل يرجع سنة وسنتين ويمكن 20 كمان لحد ما يوصل لأخر وقت كان حاسس فيه بالأمان ويثبت عنده ويعيش فيه، ممكن يكون الوقت دا كان وهو عنده 10 سنين مثلا في تلاقي تصرفاته فجأة اتحولت لطفل عنده 10 سنين.

كل دا هو لسه موصلش لـ"الكتاتونيا "، كل اللي فوق دا ممكن يتعالج مع الوقت ومش هياخد فترة طويلة غالبا لكن الأصعب والأبشع لما الشخص دا يفضل يرجع بالزمن وميلاقيش ولا فترة من حياته حس فيها بالأمان، ولا في مراهقته ولا في فترة بلوغه ولا حتى في طفولته، ساعتها عقله بيقرر بشكل غير مقصود إنه يتحول لجثة، جثة بجد، هو منتحرش ولا شنق نفسه مثلا بس هو قرر ينعزل عن العالم الخارجي بكل صدماته وبشاعته وكل الحاجات المؤلمة اللي مر بيها في حياته، متخيل إنسان عايش كأنه ميت، ساكت مبقاش قادر يقول ولا كلمة، دا كمان فقد السيطرة على حركته وجسمه وكل حاجة، واتحول لجماد مالوش أي دور.

في أسباب كتير لوصول الناس للمرض دا، زي إن حد وصله من كل اللي حواليه إنه فاشل وعمره ما هينجح في أي حاجة، أو إن حد اتقاله كلام وجعه ومقدرش يكمل حياته بعد كدة، خلوا بالكوا من كل كلمة بتقولوها للناس لإنكوا ببساطة ممكن تكونوا سبب في إنقاذ حد من الدخول في حالة مرضية صعبة وممكن جدا تكونوا سبب في إنهاء حياته وتحولوه لجماد عايش على الأرض، قربوا من الناس اللي مشاكلهم كتير وخليكوا معاهم حتى لو وجودكوا مش هيحل حاجة من المشاكل دي بس كفاية إحساسهم بالآمان وإن لسه في ناس عايزينهم وعايزين يكونوا معاهم.

يمكن كلمة حلوة منك تكون سبب في مساعدة حد قدرته على مواجهة العالم الخارجي خلصت، الناس اللي طول الوقت بيقولوا كلام يضايق، اللي بيهملوا الناس بعد ما دخلوهم حياتهم وبقول جزء أساسي من يومهم، اللي بيبعدوا فجأة وبينهوا العلاقة فجأة، كل اللي بتعملوه دا تأثيره كبير جدا جدا على اللي حواليكوا.

وبالمناسبة المرض دا سموه كدة لأن كتاتونيا كلمة أصلها لاتيني ومعناها "جثة"، فرفقا بعقول الناس وقلوبهم.

الكاتبة والمحررة الإعلامية الدكتورة دينا المصري