دكتورة دينا المصري تكتب: الطفل مش تجربة.. الطفل نتيجة اختيار

اختاروا بعناية من تنجبون منه طفلًا، خلّوا الجملة دي ترن في ودانكم كويس قبل أي قرار مصيري، مش كل راجل ينفع يبقى أب، ومش كل علاقة ينفع تطلع منها روح جديدة، لأن الطفل مش تجربة؛ الطفل نتيجة اختيار.

اختاروا بعناية من تنجبون منه طفلًا؛ لأن الغلط هنا ثمنه إنسان بيتألم، طفل مالوش ذنب يعيش في بيت مليان خناقات، ولا يكبر وهو شايف وجع أمه، ولا يتحمل نتيجة قرار اتاخد من غير وعي، أنا مدينة لطفلي باعتذارات لا تنتهي، عن كل لحظة خوف حس بيها، عن كل مرة شاف فيها توتر بدل الأمان، عن كل وجع ما كانش المفروض يشوفه أصلاً.

الأب مش اسم بيتكتب في شهادة ميلاد؛ الأب مسؤولية وأمان، مش كل حد ينفع يتحط في المكان ده، لأن وجوده الغلط بيدمّر أكتر ما بيبني.

أصعب شعور إنك تبصي لطفلك وتحسي إنك قصّرتي في اختياره قبل ما تقصري في تربيته، وإنك جبتيه لدنيا كان ممكن تبقى أهدى وأأمن، لو كنتي اخترتي صح من البداية، مش كل حب ينفع يبقى جواز، ومش كل جواز ينفع يبقى أبوة، في علاقات تنفع تعيش يومين، بس ما ينفعش تطلع منها حياة كاملة.

اختاروا بعناية؛ لأن اللي بيتظلم في الآخر مش أنتم، اللي بيدفع التمن الحقيقي طفل، بيكبر شايل حاجات أكبر من سنه، وحاجات ما اختارهاش، الحقيقة اللي بتوجع بس لازم تتقال؛ أكبر ظلم لطفلك اختيار أب غلط ليه من البداية، مش التربية بس هي اللي بتبني، الاختيار الأول هو الأساس.

الخلاصة: اختاروا بعناية من تنجبون منه طفلًا، علشان ما تبقوش طول عمركم، مدينين باعتذارات لطفل مالوش ذنب.

الكاتبة والمحررة الإعلامية الدكتورة دينا المصري