دكتورة دينا المصري تكتب: دليل النجاة

إزاي نفك التعلق من غير ما ننهار؟، 20 حل؛ حلول صادمة لفك التعلق (مش لكل الناس .. بس للي عايز ينقذ نفسه)، (دليل النجاة من الانسحاب العاطفي)، مبدئياََ خليني أقولك الحقيقة، إنتي أو انت مش محتاج تنسى، إنت محتاج تستعيد السيطرة العصبية.

التعلق مش بس مشاعر، ده مسار عصبي اتبنى، ومهمتنا مش نكسره فجأة مهمتنا نحوله.

1) طريقة "تفريغ الجرعة" بدل القطع المفاجئ

الناس دايماََ تقول
"اقطع خالص".
"بلوك" .
"اختفاء كامل".

بس في بعض الشخصيات الحساسة.. القطع المفاجئ بيعمل انهيار، يعني بدل ما كنت بتدخل بروفايله 20 مرة تنزلهم لـ 10، بعد أسبوع 5، بعد أسبوع 2، ثم صفر، مخك لازم يحس إنه بيشارك في القرار.. مش اتسرق منه.

2) إعادة برمجة المخ "بالمثير البديل"

المخ كان رابط

صوته = راحة
رسالة منه = دوبامين
مكالمة = أمان

لازم نخلق روابط جديدة.

كل مرة يجيلك اشتياق أوي.

اعمل نشاط بيضرب دوبامين طبيعي

مشي سريع 20 دقيقة

دوش بارد

تمرين مقاومة

اكتب إحساسك في ورقة

مكالمة مع شخص آمن

المهم تعمل ربط جديد

الوجع = حركة
الاشتياق = نشاط مش = رجوع.

3) تقنية "فك التقديس"

أخطر حاجة في التعلق إننا بنقدس الشخص .

نعمل تمرين صادم

اكتب قائمة كاملة

عيوبه

لحظات قلل منك

مواقف ما حسيتش فيها بالأمان

كل مرة اتوجعت

مش عشان تكرهه ..
لكن عشان مخك يبطل يشوفه ملاك .

التعلق قائم على صورة مثالية ..
اكسر الصورة ، مش الشخص .

4) إعادة تعريف الهوية

التعلق بيعمل حاجة خطيرة

"أنا" بتتحول لـ "إحنا" .

فلازم نرجع نسأل : أنا مين من غيره؟

اكتب

حاجات كنت بتحبها قبله

ناس أهملتهم

أهداف وقفتها

نسخة نفسك اللي اتجمدت

كل يوم ترجع حتة من نفسك.

5) تفريغ المشاعر المكبوتة "الطريقة المحرمة"

في حاجات بنخاف نعترف بيها

غيرة
رغبة
غضب
كره
حنين جسدي

اقعد لوحدك ..
واتكلم بصوت عالي كأنه قدامك .

قول اللي ما اتقالش .
اشتم لو لازم .
اعترف إنك اشتقتله .
قول إنك زعلان .

الجسم محتاج يطلع الطاقة دي ..
وإلا هتتحول لمرض .

6) قاعدة "الـ 90 ثانية"

أي موجة اشتياق عنيفة ..
مدتها العصبية 90 ثانية .

لو ما غذيتهاش بفكرة .. هتعدي .

جرب المرة الجاية : اقفل عينيك
اتنفس ببطء
عد 90 ثانية
وما تعملش أي حركة .

هتتفاجئ إن الموجة بتنخفض .

7) إعادة توزيع الأمان

التعلق بيحصل لما شخص واحد يكون

حبيب
صديق
أب
أم
ملجأ
طبطبة
مستقبل

ده خطر .

لازم الأمان يتوزع

صديق يسمع

رياضة تفرغ

شغل يدي قيمة

عيلة توفر دعم

الأمان لما يكون في شخص واحد .. فقده بيدمر .

8) اتقبل إنك هتضعف .. بس من غير تصرف

الفرق بين النضج والانهيار ؟

إنك ممكن تحن ..
بس ما تتصلش .

ممكن تشتاق ..
بس ما تبعتش .

المشاعر مش عيب .
التصرفات هي اللي بتعيد الدايرة .

9) تكنيك "القفل الرمزي"

المخ محتاج نهاية .

اكتب رسالة أخيرة ..
مش عشان تبعتها .
لكن عشان تقفل الدائرة .

اطبعها .
اقفلها في ظرف .
حطها في درج .

ده بيعمل قفل عصبي .

10) أهم حاجة محدش بيقولها

التعلق بيتفك لما

تستحمل الفراغ .

مش لما تملأه بسرعة .
مش لما تدخل علاقة جديدة .
مش لما تنتقم .

الفراغ ده هو المساحة اللي هيتولد فيها شخص أقوى . وهو انت

11) تقنية "كسر الرومانسية بالقبح"

التعلق بيعيش على مشاهد مختارة
ضحك
صوت دافي
لحظات حميمة
نظرة عيون

مخك عامل مونتاج .. أحلى نسخة .

الحل..

كل مرة ييجي مشهد حلو ..
اقطع الفيلم .
وكمل المشهد للنهاية الحقيقية .

فاكر الحضن ؟
افتكر اللي حصل بعده .
فاكر الضحكة ؟
افتكر اللي كسرها .
فاكر وعده ؟
افتكر إنه ما نفذوش .

مش علشان تكرهه .
لكن علشان توقف خداع الذاكرة الانتقائية .

12) تقنية "التشبع المتعمد"

بدل ما تهرب من الذكريات ..
اقعد معاها لحد ما تزهق .

شغل الأغنية اللي كانت بتوجعك .. 10 مرات ورا بعض .
اقعد في المكان اللي كنتوا فيه .. لوحدكم .
اقرأ الشات القديم كله مرة واحدة .

المخ بعد فترة يعمل حاجة اسمها التأقلم أو التعود .
التكرار يقلل الشحنة .

الوجع بيفقد بريقه لما يتشبع .

13) طريقة "قتل الأمل"

أخطر حاجة في التعلق ؟
الأمل الخفي إنه يرجع .

حتى لو بتقول لنفسك لا ..
جواك فيه صوت بيقول
"يمكن .."

الحل ؟
اكتب أسوأ سيناريو منطقي .

تخيله مع حد غيرك

تخيله بيضحك

تخيله ناسيك

تخيله مش فارق معاه

مش علشان تعذب نفسك ..
لكن علشان تقتل الوهم اللي بيغذي الاشتياق .

الأمل غير الواقعي = سم بطيء .

14) تقنية "إعادة توزيع الألم"

الناس بتحاول تهرب من الألم ..
فالألم يكبر .

جرب تعمل حاجة صعبة جسدياً
تمرين عنيف
جري
صيام متقطع
حمام تلج

لأن الألم الجسدي الواعي
بيقلل الألم العاطفي العشوائي .

المخ لما يختار ألم ..
يحس بسيطرة .

15) الاعتراف المحرم "أنا كنت محتاج"

أوقات التعلق مش حب .
هو احتياج .

احتياج احتواء
احتياج اهتمام
احتياج إثبات قيمة
احتياج رغبة جسدية

قولها بصوت عالي
"أنا كنت محتاج .. مش بس بحب" .

لما تفصل الاحتياج عن الشخص ..
تقدر تعالج الاحتياج من غيره .

16) تقنية "تفكيك الطقوس العادة"

التعلق بيبقى ليه طقوس وعادة

قهوة الساعة 10
أغنية معينة
مكان معين
وقت مكالمة

اكسر الطقوس اللي متعود عليها

غير مكان القهوة .
غير ترتيب أوضتك .
غير روتين نومك .

لأن الطقوس بتستدعيه .. حتى لو مش موجود .

17) المواجهة الباردة مع الحقيقة

اسأل نفسك السؤال اللي بيوجع

لو كان فعلاً عايزك ..
كان سابك ؟

متجاوبش بإحساس .
جاوب بمنطق .

التعلق بيخلي المخ يلف حوالين السؤال .
الإجابة الواضحة بتفك العقدة .

18) إعادة تعريف الجرح

إحنا دايمًا شايفين الفقد خسارة .
طب لو كان حماية ؟

كم مرة كنت قلقان ؟
كم مرة شكيت في نفسك ؟
كم مرة اتكسرت ؟

أوقات الانسحاب ..
هو إنقاذ متأخر .

19) تقنية "النسخة القادمة"

اكتب مواصفات العلاقة اللي تستحقها فعلاً .
مش اللي كنت ماسك فيها .

ولما تخلص ..
اسأل نفسك بهدوء

الشخص ده كان ينفع فيها ؟

التعلق بيتمسك بالموجود .
النضج بيبص للأجدر والاحسن .

20) وأخطر حل ..

تسيب نفسك تحزن بالكامل .

مش تمثل القوة .
مش تبان جامد .
مش تدخل علاقة جديدة عشان تثبت إنك تمام .

ابكي .
انهار لوحدك .
اقعد في الفراغ .

لأن اللي بيهرب من الألم ..
بيرجع يتعلق تاني أسرع .

الحقيقة القاسية

فكّ التعلّق مش بيحصل لما تنسى .
بيحصل لما تبطل تخاف تعيش من غيره .

وأول ما المخ يفهم إنك نجيت ..
هيهدى .

الجملة الأخيرة في المقال

إنت مش بتفك تعلق عشان تبقى حجر .
إنت بتفكه عشان لما تحب تاني ..

تحب من قوة
مش من احتياج.

الكاتبة والمحررة الإعلامية الدكتورة دينا المصري