جمال عبد الحميد: مدرسة المشاغبين بوّظت التعليم.. والأعمال التي تقدم عبارة عن شر

كشف المخرج جمال عبد الحميد رأيه في الأعمال التي تقدم حاليًا، وسر ابتعاده عن الإحراج منذ فترة، بجانب الحديث عن خلافه مع الكاتب الراحل أسامة أنور عكاشة.

وقال جمال عبد الحميد في تصريحات تلفزيونية: أنا عندي ورق لأني بكتب أحيانا روايات وقصص، وكمان عندي أعمال لمؤلفين كبار مش بيشتغلوا، وللأسف فيه عدد كبير من الفنانين والمخرجين مش بيشتغلوا بسبب الإنتاج وقاعدين في البيت.

وواصل جمال عبد الحميد: الأعمال اللي بتتقدم مالهاش علاقة بالمجتمع المصري، ومينفعش نقلد الغرب ودلوقتي بيجيبوا مخرجين ينفذوا اللي الإنتاج عايزه بدون جدال، وأنا مينفعش معايا الكلام ده، والمفروض المخرج هو المسؤول عن العمل وليس الإنتاج.

وأضاف جمال عبد الحميد: الأعمال حاليًا بقى فيها جرائم بشكل مبالغ فيه وبنلاقي ممثل بيقتل والده في العمل والكلام ده ميصحش، لأن التلفزيون بيدخل كل بيت وأفراد العائلة كلها بتتفرج، والمفروض اللي يتقدم يكون الخير قصاد الشر، ولكن اللي بيتقدم دلوقتي عبارة عن شر فقط.. وشايف إن مسرحية مدرسة المشاغبين بوظت التعليم على الرغم من إنها كانت مسرحية ناجحة جدًا، وطبعًا أغلب الممثلين هايلين ولكنها كانت ضد المنظومة التعليمية.

وتطرق جمال عبد الحميد، للحديث عن علاقته بالكاتب الراحل أسامة أنور عكاشة، مشيرًا إلى أن خلافه معه بسبب تدخله في الإخراج واتفقا في النهاية ألا يتعاونا معًا مرة أخرى بسبب خلافاتهم المستمرة في العمل، ولكن حتى اللحظات الأخيرة كانت علاقتهما جيدة وتجمعهما صداقة وطيدة بعيدا عن العمل.