نرمين الفقي: مُقلة في الأعمال بس مش بكيفي.. ويكسرني الراجل اللي يمد إيده عليّا

عبّرت الفنانة نرمين الفقي عن سعادتها بمشاركتها في مسلسل الكبير أوي 6، مع الفنان أحمد مكي، متحدثةً عن المواقف التي يمكن أن تكسرها ومنها أن يضربها الرجل الذي تختاره في المستقبل للارتباط به.

وقالت نرمين الفقي خلال مداخلة هاتفية لبرنامج اللمة تحلى على شعبى إف إم: أول حد لمتي بتحلى معاه هما أهلي وعيلتي بعد كده أصحابي، أنا برتاح مع الناس الطبيعية التلقائية اللي بنحب بعض بجد ومن قلبنا، وأنا مُقلة في أعمالي وده مش بكيفي، حسب الأعمال اللي بتتعرض عليا، ولأني بنتقي أدواري، ومفيش فنان بيقعد في البيت بمزاجه، أنا لا يمكن أقول إن كل اللي جاني كانت حاجات عادية بالنسبالي، لا يمكن أقول كده إطلاقًا.

وأضافت: كل أعمالي أرهقتني احنا مهنتنا صعبة للغاية وكل عمل بياخد من صحتنا وعمرنا وبياخدنا من أهالينا وبياخدنا من حاجات كتير أوي وافتكر كنت بعمل آخر جزء في مسلسل نصيبي وقسمتك كنا بره بيتنا حوالي 36 ساعة وفي أبو العروسة من التعب بعد ما خلصت روحت المستشفى.

وتابعت نرمين الفقي: بحاول أغير جلدي واعمل أدوار متنوعة وحاولت بشتى الطرق إنى أبين موهبتي حسب العمل اللى بيتعرض عليا.

وأشارت نرمين إلى أن الشيء الذي يمكن أن يكسرها هو اختيارها لإنسان سليط اللسان أو يضربها أو الرجل الذي ترتبط به يُشعرها أنها تبذل مجهود هباءً وأنها لا تفعل شيئًا بحياتها.

وأردفت: أمي الله يرحمها كانت بطفش العرسان منى لأنها كانت متعلقة بيا وكانت صاحبتي أوي وتحولت إلى بنتي لما تعبت وكانت بتخاف عليا أوي، خاصةً إن علاقتها بوالدي مكنتش حياة طبيعية وانفصلوا فكانت خايفة عليا أوي إن أنا ممكن أتأذي.

نرمين الفقي والكبير أوي 6

واختتمت، قائلةً: اتبسطت أوي بمشاركتي كضيفة شرف في الكبير أوي 6، استمتعت استمتاع غير طبيعي والكاست كان حلو أوي كل الناس كانت هايلة ده غير إن مكى تحسيه من جواه تلقائي وموهوب وكان نفسي أكمل أكتر.