مبروك عطية عن شروط الزواج: لازم واحد معاه فلوس وعنده شهوة

علّق الدكتور مبروك عطية، العميد السابق لكلية الدراسات الإسلامية جامعة الأزهر فرع سوهاج، على معاتبة المتابعين له، على خلفية حديثه عن واجبات الزواج وتطرقه إلى وجوب وجود قدرة مالية وقدرة جنسية على حد سواء.

وقال مبروك عطية، خلال بث مباشر عبر صفحته الرسمية على موقع التواصل الاجتماعي فيس بوك: الرد على مدام منى أبو شنب بناءً على طلبها، فهي قالت أحييك وأقدر نبرتك ودعوتك.. قبل ما أرد عليكي الله يسامحك على كلمتك عيب يا دكتور مبروك.. دي كلمة كبيرة.. بس أنا مش هآخذك عليها.. مفيش عيب في الشرع.

مبروك عطية: هناك شرطان لكي يكون الزواج واجبًا

وأضاف عطية: أنا عايز أتجوز يعني فيه شرطين لازم يتحققوا زي الفقهاء ما قالوا.. شرطين لكي يكون الزواج واجبًا.. القدرة المادية والقدرة على معاشرة المرأة معاشرة حميمية.. شروط الجواز واحد معاه فلوس وعنده شهوة للنساء.

واستدل مبروك عطية بما ورد في البخاري ومسلم، قوب النبي صلى الله عليه وسلم: “يَا مَعْشَرَ الشَّبَابِ مَنْ اسْتَطَاعَ منكُم الْبَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ، وَأَحْصَنُ لِلْفَرْجِ، وَمَنْ لَمْ يَسْتَطِعْ فَعَلَيْهِ بِالصَّوْمِ فَإِنَّهُ لَهُ وِجَاءٌ”، مشيرًا إلى أن الباءة وردت في الحديث بمعنى القدرة المادية، بالإضافة إلى القدرة على المعاشرة الجنسية.

تابع العميد السابق لكلية الدراسات الإسلامية: فيه ناس اتجوزت غلط، من وهو في اللفة واحنا بنقول لأهله تشوفك في الكوشة، فأصبح كل اللي على لساننا الجواز..فيه ناس اتجوزت وهي معنداش قدرة جنسية.. مش لازم يفرحوا بيه وهو في الكوشة.. ممكن يفرحوا بيه وهو في الجامعة أو معافى في صحته.

وأكّد مبروك عطية: اللي بيتجوز وهو غير راغب في المرأة بياخد فياجرا أو يضرب إبرة ويجيبلنا عيل.. ويكون سلم النمر.. هيعيش طول حياته بفياجرا ولا إبر! واللي ممعهوش فلوس أسود وألعن لأن الحياة كلها فواتير.