"بنت الجيران” بتاريخك كله.. 12 رسالة من شاكوش لرضا البحراوي

رد مطرب المهرجانات حسن شاكوش على هجوم الفنان رضا البحراوي عليه بعد أن أعلن الأخير أنه قام بسبه هو وأهله في الساحل الشمالي.

وروي حسن شاكوش تفاصيل تلك الواقعة، ووجه عدة رسائل له عبر بث مباشر على صفحته بـ"فيسبوك" وهو ما سنرصده في النقاط التالية..

- كان عندنا شغل في الساحل وأنا عندي نمرة مينفعش أطلع أغني وألاقي فرقة حاطة العدة بتاعتها في نمرتي والأصول كل واحد ياخد حقه.

- بلغت مرة واتنين وتلاتة وفرقة رضا البحراوي على المسرح وأنا بغني هما كانوا بيحضروا وسامع أصواتهم خلفي ودة مينفعش وبعد ما خلصت الأغنية قولتلهم لو سمحت مش عاوز أشوف حد على المسرح والفرقة نزلت.

- حد من الفرقة شتمني وعملوا حركة كأنهم بيزفوني وأنا نازل وأنا أما شفت دا أنا حر من بولاق الدكرور أما بشوف الغلط مش بعرف أسكت أنا عندي 12 مليون متابع على صفحتي وأنا مقدرش أغلط وأقول حرف فيه غلط.

- بعدها رضا البحراوي طلع قال: "هو شاكوش فين هو هرب الصراحة كان نفسي فيه"، ولكن أنا مجرتش أنا خلصت نمرتي وروحت بيتي.

- رضا البحراوي بيقول إني قمت بسب أهله ولكني بقول لم أقم بذلك لأن والدته في مقامة والدتي وجزمتها فوق رأسي لأنها من مقام أمي وأنا بقول أفيه في فيلم "حين ميسرة" وقولته في حفلة والناس رددته خلفي ولم أتطرق لسيرة رضا البحراوي.

- أنا مع كلام رضا البحراوي أن بلدنا فوق القانون وكل واحد ياخد حقه لو هتبص على الغلط يا رضا فا أنت الغلطان وأنت اللي قولت عليا إني جريت.

- انت قولت أنا بتصل بيك عشان عاوز أعمل دويتو معاك وهذا غير صحيح وهو لما تقول هو شاكوش فين أنا نفسي فيه هو دا الفن من وجهة نظرك.

- انت قولت يا رضا إنك بتغني قبل ما أنا أتولد، فأنا عاوز أقولك بالأرقام: "أنا قناتي 2 مليار مشاهدة عشان انت بتتكلم على التاريخ وانت بتغني قبل ما أنا اتولدت، أنت لو طلعت البطاقة هتلاقيني أكبر منك يا رضا وبحقق أرقام لو اشتغلت طول عمرك ولحد ما شعرك يبيض مش هتعرف توصل بس لنجاح بنت الجيران بس".

- أنا بطلع أغني شغلي مثل "وداع يا دنيا وداع" و"أشكرك" و"حبيبتي" و"بنت الجيران" لكن أنت ملكش أغاني بتغني أغاني مش بتاعتك وانت ملكش "cv" وانت بتاخد عالجاهز وأنا مش بطلع أتكلم على تاريخي وعلى نجاحي والجمهور هو اللي بيقيم مش الجمهور وتعبنا لحد ما نجحنا.

- أنا اشتغلت مع نجوم كبار مثل أحمد سعد ، فبالتالي هغني معاك إزاي وياريت تطلع المحادثات اللي بينا اللي بطلب فيها الغناء معاك.

- البلد فيها قانون فعلا زي ما بتقول وانت اللي قولت: "هو فين حسن شاكوش أنا كان نفسي فيه" وأنا مجبتش سيرتك.

- لو على التاريخ والأرقام تعالى نشوف أرقام مين أكتر وأعلى أنا أغنية بس من بتوعي "بنت الجيران" حققت 700 مليون مشاهدة بتاريخك كله ومش بغني أغاني حد.

ووقعت مشادة قوية ومشاحنات بين مطرب المهرجانات حسن شاكوش، والمطرب الشعبي رضا البحراوي وفرقته، وذلك في الحفل الذي أقيم مساء الجمعة الماضي بالساحل الشمالي.

وعلق مصدر من نقابة الموسقيين، حول هذه الواقعة قائلاً في تصريحات صحفية: "حتى الآن لم يصلنا أي شكوى من أطراف الأزمة حسن شاكوش أو رضا البحراوي، وفي حالة وجود الشكوى يتم تحويل الطرفين إلى تحقيق إداري".

وتابع: "ما حدث مكانه أقسام الشرطة، والشق الجنائي يتم نظره أمام النيابة العامة، وذلك في حالة لجوء أحد لها، أو تقديم محضر عن الواقعة، ولم يحدث ذلك حتى الآن".

وكانت المشادة قد بدأت مع صعود مطرب المهرجانات حسن شاكوش، في حضور فرقة المطرب الشعبي رضا البحراوي، وبعد شد وجذب غادر الأول مكان الحفل، وصعد البحراوي إلى المسرح وقال: " شاكوش فين.. مشي.. كنت عايزه والله.. بس للأسف خد بعضه وجرى.. عايزه يدعي لـ حمو بيكا".