يسرا تروي ذكرياتها مع سمير غانم : "كنت بسخسخ معاه من الضحك ”

حلت الفنانة يسرا، ضيفًة على الإعلامي رامي رضوان في برنامج ”مساء DMC”، المُذاع عبر شاشة قناة DMC، وخلال اللقاء تحدثت عن علاقتها القوية وذكرياتها مع الفنان الراحل سمير غانم وزوجته الفنانة دلال عبد العزيز.

تقول يسرا : ”في بداية حياتي اشتغلت مع سمير غانم وكنا بنعمل مسلسل ”حكاية عريس وعروسة”، وأنا كنت ضعيفة خالص في حكاية الفيديو، ولو الكاميرا قدامي أديها ضهري فيقولي إنتي بتمثلي بوشك متخليش قفاكي للكاميرا، فبقوله مبحبش أبص للكاميرا يا سمارة وكنا بنضحك ضحك”.

تضيف، ”سمير غانم قالي كنت ألاقي واحدة حلوة كدة واقفة تقولي هتجوزك يا سمير لحد ما أتجوزتها، والعلاقة اللي بين سمير ودلال مش زوج وزوجة بس في صحوبية وفي جدعنة وفي شهامة”.

تردف، “لما والدتي تعبت في المستشفى كانت دلال عبد العزيز وميرفت وبوسي شلبي كل يوم كانوا يجولي ويعملولي أكل ويبعتهولي ومسابونيش”.

تستطرد يسرا خلال الحلقة، ”تجمعنى صداقة قوية بدلال عبد العزيز محدش يقدر يخترقها ولا يكسرها ولا يلغيها مهما حصل واللي بيني وبينهم كبير أوي وأكبر من توقعات أي حد،

صداقتي بدلال وسمير مثل الكنز الأساسي في حياتك لما ربنا يديك صديق يخاف عليك ويحبك فأنت غني قوي، وسمير غانم كان حاجة حلوة ونضيفة وطيبة، وعمره ما غلط في حد ولا زعل حد ولا جاب سيرة حد، وكان شاري دماغه وميحبش الحزن، ولما بنشوف أعمال سميرغانم دلوقتي بنبتسم من غير ما نتكلم، سيرته لما تيجي بنبتسم، لأنه كان عاوز كدة وبيحب كدة..لو قال كلمة عادية مش بتطلع منه عادية، ولو قال كلمة مش بتضحك هتطلع منه بتضحك، لما كنت بمثل معاه كنت بسخسخ، كنت بموت من الضحك معاه”.