معز مسعود يدعم حلا شيحة بهذه الكلمات

نشرت الفنانة حلا شيحة عبر حسابها الشخصي بمواقع تبادل الصور والفيديوهات الشهير "إنستجرام" صورة لزوجها الداعية الإسلامي معز مسعود وهو موجهًا لها بعض كلمات الدعم.

قائلًا: "الى زوجتي الغالية حلا، قادر افهم انزعاجك نتيجة مرور وقت كبير على تصوير الفيلم ده بسبب كورونا وان حياتك اتغيرت زي ما أنتِ قولتي في البوست بكل احترام، قادر كمان افهم انزعاجك من التركيز على المشاهد دي وتجميعها رغم الوعد الشفهي بتجنب ذلك من صناع العمل الكلام ماكانش عن إلغاء الكليب ولكن إن التركيز ميكونش على مشاهد معينة زي دلوقتي، خصوصًا مع نزول الكليب في توقت له قدسية كبيرة بالنسبة لنا".

متابعًا: "ولو كنا نعرف أن الوعد مش كافي علشان يحل المشكلة دي كنا مشينا في حلول تانية اللي بينك وبين ربنا فيما يخص أجورك عن أعمالك السابقة مش مضطرة تقوليه لحد، ومتشغليش بالك بأي كلام بيتقال بغير علم، الناس مش بتاخد بالها من تفاصيل كتير ابسطها الوقت الطويل والأحداث الكبيرة اللي بتحصل في حياة اللي بيتكلموا عنهم بمنتهي الاريحية والثقه والتسرع في إصدار الأحكام".

مضيفًا: "قادر أفهم قصدك لما اتكلمتي عن نوع معين من المشاهد يعني نوع معين من الفن ومش تعميم على الفن كله، وعاوز افكرك يا حبيبتي إن رحلتنا هي رحلة بحث عن الحق والخير والجمال، رحلة اعتزاز بالثقافة والهوية، نموذج قوي لرفض التطرف على الناحيتين، الناحية المكسوفة من هويتها وبتقلد الغرب من غير حكمة أو علم أو عزة اللي انا سميته الانتحار الثقافي في كلمتي في الحوار الوطني سنة 2011".

مكملًا: "و الناحية التانية المسجونة في قوالب مميتة للفكر والفنون كل ناحية منهم فاكرة أنها معاها الحقيقة المطلقة وهيفضلوا يتخانقوا إلى يوم الدين، بحد ما يظهر ناس عندهم الشجاعة والاعتزاز بثقافاتنا وهويتنا، بيحملوا هم أولادنا والأجيال الجاية وساعتها هيكون فننا بيعبر بجد عننا".

داعمًا لها قائلًا: "الشجعان زيك بس هم اللي بيمشوا الرحلة بصدق وإصرار لحد ما يوصلوا، مهما كارت المحطات، مهما كان الألم والحيرة واللخبطة، مهما كان الهجوم والخذلان والمزايدات، مهما كان التمن اللي بيتدفع، الشجعان زيك بس هم اللي بيراجعوا نفسهم وبيعترفوا بأخطائهم ويصلحوها، ده غير إن المشهور رحلته بتكون تحت المجهر".

متحدثًا: "الشجعان زيك بس بيعيشوا بتلقائية واتساق مع النفس، فنوننا وثقافتنا وهويتنا يقدروا يتقابلوا انا بدأت اعمل ده في أعمالي الفنية وفيلمي اشتباك افتتح في مهرجان كان وفيلمي القادم رايح مهرجان فينيسيا قريب".

مختتمًا حديثة قائلًا: "هنقدر ناخد أنا وأنتِ خطوات أكبر وأمثل على الطريق العظيم ده اللي هتعرف قيمته الأجيال القادمة، وتاني بقولهالك يا حبيبتي رحلتنا واحدة".