"جرحنى بعجزي".. أميرة البيلي تنشر قصيدة جديدة

جرحنى بعجزي عن إنى أرد القسوة ليه لكن ..
أنا قلبى مهوش داكن علشان يقسى ويكره حد
مهواش حد .. !
فـ ليه جرح .. فـ ليه جرح وزعلنى ..
ياريته ما رد
وليه اتغير بقى بارد ..
وليه شارد بعيد عنى !
ماكان بيقول زمان إنى مراته وأم العيال وقالى إنى هبقاله ..
أنا باقية .. !
لكن هو الى بيعافر ليخسرنى ..
كسرنى لكنى حبيته
يارتنى ماكنت حبيته
وهبته القلب وإديته حنين عمره ماكان يحلم بحد يحبه يوم قدى
خلاص عدى ودوس على قلبى كااام مره ..
وعيد من تانى فى الكره ..
وعلقنى بحبال بايشة
ما أنا عايشة .. !
وهبلة وساكتة وبطنش ..
كإن دموعى شئ عاادى ..
كإن فراقنا شئ عادى ..
وهذا الوضع مش عادى
فإسمعنى .. !
أنا ماشية ..
أنا كنت فى هواك طايشة ..
ضعيفة وروحها كات بايشه ..
وحالك لسه ميسرش وحالى معاك مهوش ولا بد ..
يرد يقولى مش غلطان ..
ومانتيش قادرة تتعاملي مع تعبي
أنا مليت .. أنا الهبلة الى شوفتك بيت ..
وقولت أبويا وحبيبى ..
ياسيدى كفايه والله ده أنا إتخميت
وفكرتك هتبقالى السند والأهل ... !
مهواش سهل بإن البنت يوم تعشق ..
ولو تعشق بتوهب روحها وحياتها وتتحمل وتتجمل علشان تحلو فى عيونه فميبصش فى يوم بره
خلاص برا ... !
أنا استحملت ميت مره .. وسيادته غاوى يتعبنى
يا سيدي ما تمشي وتسيبني ، بتتعب قلبي ليه وياك
بتكدب ليه وتتمارض وتتعصب وبتعارض
وتخلق مشكلة تافهة ..
ده قلب البنت لو شافها بتتكسرر علشان واحد بيقفل
وقتها بابه ومبيفتحش ..
فمتجرحش ... !