حكم تاريخي يزلزل المستشفيات: الطبيب ”مداوٍ” وليس ”أمين مخزن”.. ولا يُسأل عن عهدة

"السونار مش في جيبي".. الإدارية العليا تنتصر للأطباء: قصاصة الورق ليست "عهدة" والطبيب مش "غفير"!

براءة "تاريخية" لطبيب.. المحكمة تهدم أسطورة "الاستلام الودي" بالورقة والقلم.

لو ضاع "البروب" المحكمة تحميك.. بشرط: "متمضيش على استمارة مخازن".

الإدارية العليا تقطع الشك باليقين: الطبيب يكشف على المرضى.. والحراسة لها أصحابها.

_ من قلب الواقعة: فخ "البروب" المفقود

الحكاية بدأت لما طبيب لقى نفسه "مخصوم له" 10 أيام من مرتبه، والسبب؟ "بروب" جهاز السونار اختفى، والإدارة قالت له: "إنت اللي كنت شغال عليه يبقى إنت المسؤول". مش بس كده، ده كمان اتهموه إنه جمع قرشين من زمايله عشان يصلح الجهاز "من ورا" الإدارة. الطبيب مأسكتش، وقرر يروح لأعلى منصة قضاء إداري في مصر عشان يرجع حقه.

_ حكم يبرد القلب ويحدد المسؤولية

المحكمة الإدارية العليا في حكمها (رقم 6236 لسنة 59 ق) مسبتش ثغرة إلا وسدتها، وحطت شوية نقط فوق الحروف، تهم كل موظف في مصر مش بس الأطباء:

1. "الورقة الصغيرة" تبلها وتشرب ميتها!

المحكمة قالتها بصريح العبارة: مفيش حاجة اسمها "استلمت الجهاز" على قصاصة ورق أو ورقة عادية. العهدة الحكومية "مقدسة" وليها إجراءات، لازم "استمارة مخازن رسمية" ونماذج معتمدة. لو الإدارة جابت "مليون شاهد" يقولوا إنك استلمت، وكلامهم مش متوثق بورق المخازن الرسمي.. يبقى كلامهم "زي قلة" والقانون ميعترفش بيه.

2. أنا "دكتور" مش "أمين مخزن"

المبدأ التاني اللي المحكمة ثبتته هو "الاختصاص". الطبيب شغلته يكشف بالجهاز، يشخص الحالة، يعالج المريض.. لكن مش شغلته يفضل بايت جنب الجهاز يحرسه من السرقة. المحكمة قالت إن "المسؤولية" لازم تكون عن حاجة من صميم شغلك، وحراسة المخازن مش شغل الدكاترة.

3. "البراءة" هي الأصل

ممنوع تجازي موظف بناءً على "ظن" أو "تخمين". لازم المخالفة تكون ثابتة "زي الشمس". وبما إن الطبيب متمضاش على ورق رسمي باستلام "البروب"، يبقى الإدانة هنا باطلة، ورجع الحق لأصحابه.

_ كلمة أخيرة.. عشان ميتخصمش منك

المحكمة برأت الطبيب من تهمة ضياع الجهاز، بس ثبتت عليه تهمة "لم الفلوس" للإصلاح (عشان دي مخالفة إدارية حتى لو نيتك خير)، وعدلت العقوبة لـ 5 أيام بدل 10.

واخيرا وليس اخرا هنا الى فريق الجيش الابيض فريق عمل الصحه ؛ الدرس اللي نطلع بيه: يا دكتور، ويا كل موظف.. "متمضيش على الهوا". أي جهاز أو عهدة تستلمها لازم تكون بـ "نموذج مخازن رسمي". غير كده، القانون في ضهرك وبيقول للإدارة: "فتشوا عن المسؤول الحقيقي!".