دكتورة دينا المصري تكتب: خليك قوي وخد القرار
خد قرار تبعد علشان تحافظ على نفسك
فيه لحظة في حياة أي حد فينا لازم يقف فيها قدام المراية، ويقول بصوت عالي: "كفاية.. كفاية وجع، كفاية استنزاف.. أنا استاهل أعيش مرتاحة".
الموضوع مش هزار، ومش رفاهية، ده قرار مصيري.
ابعد عن اللي بيستهلك طاقتك كل يوم، اللي كل ما تقعد معاه ترجع تعبان، دماغك مصدعة، قلبك مقبوض، ده مش صاحب ولا حبيب، ده استنزاف متحرك، وكل ثانية معاه خصم من عمرك.
ابعد عن القاسي، القلب البارد ده ما بيحنش، وميفرقش معاه وجعك، ولا بيشغله أنه يطمن عليك ويسأل حتى لو في خلاف بينكم.
تفتكر لحظة لما كنت بتبكي وأنت بتحاول تداريها وهو بيتفرج عليك متهزش وكأنك مش موجود؟، ده مش هيتغير.. واللي قلبه بارد عمرك ما تعرف تلينه.
ابعد عن الكدّاب والملاوع والمنافق؛ اللي ليه وشين مستحيل يكون ليك وش نضيف، ابعد عن اللي بينسى الحلو من الشخص اللي بيحبه ويقابله برد فعل في نكران أصل واحترامك للمساندة اللي مسابكش فيها كقابل، كل اللحظات الحلوة الكتير دي إنك تبيع وتهون وتُعاقب عقاب صمتي خاطيء كارثي هو أول واحد في اللعبة دي بيخرج خسران منها كتير وأنت الغلط منك من الأساس بس الايجو بجد هيخسرك كل شخص حقيقي وصادق كان جمبك حبك لذاتك وكان مستعد يضحي بنفسه من أجلك ألف مرة ومش هيندم لحظه على ده، وصدقني مش هتلاقيه في دنيتك مهما عشت قد ما عشت حد تلاقي معاه الحب اللي في حياته محلمتش بيه إلا مرة واحدة بييجي في العمر زي الفرصة اللي بتيجي مرة مبتتكررش لحد ما تفهم ده هتكون خسرت وساعتها للأسف اللي بيروح مبيرجعش ودي حاجة معروفة.
فاحترامًا للعشرة بينك ىبين شريكك متكونش النهاية إنك تبيع تدريجي ولامبالاه؛ اجعل النهاية تليق بيك وبها وبما صار في السابق اللي الآن من كل طيب شفته معاه ومنه وابعد عن اللي هُنت عنده مرة، عارف الإهانة دي؟، بتكسر حاجة جواك مبترجعش زي الأول، واللي استسهل يكسرها مرة، هيكسرها ألف مرة، متستناش منه يتعلم، لأنه شايف إنك استحملت، يبقى هتستحمل تاني.
ابعد عن بخيل المشاعر، اللي كل كلمة حلوة بتتسحب منه بالعافية، كأنك بتشحت حبك، أنت مش محتاج تتسول اهتمام، أنت محتاج حد يفرح بيك من قلبه ويشوفك نعمة مش عبء، يحبك في كل رد فعله، يحبك في كلمة دلع وسط حديث طويل بهتم بيكي وباللي في مشاعرك ونفكيرك حتى لو مبتحكيش وبتسكت عشان متزعلكش أفهم أنت سكوتها ورد الإجابة اللي تطمن قلبها وتريحك يا أما لو بتكون عاجز عن التصليح ده سيبها تكتب حزنها جواها مدام مقصرتش معاك في شيء وكويسة معاك مش هنحاسب الناس كمان على سكوتها في زعلها؛ يعني يا تكون قد الرضا اللي يليق بيها يا إما سيبها ساكتة وراضية وسيبها في حالها وانسى الموضوع لحد الأمور ما تمشي لوحدها.
ابعد عن اللي شايف نفسه ملاك مبيغلطش ومبيعترفش بغلطه ومبيعتذرش، اللي عمره ما بيغلط، واللي طول الوقت شايف نفسه ضحية وأنت الغلطان ولازم تعتذر، ده نوع سام، بيخليك تصدق إنك قليل وتشك في نفسك كل يوم.
ابعد عن الغايب وقت الشدة، ابعد عن أي بيدخل الزعل بينكم بعدم السؤال عن شريكك وتطمن على أحوالها مش تقعد بالأيام تعملها صمت لحد ما هي اللي تعتذر، وده مش هيحصل، طب ما أنت كده اللي هتخسر صدقني مش هي؛ هي مفيش غلطة منها ولا عليها ومع ذلك مستحملة وصابرة وساكتة أكتر من كده مقابل أيه.. الحب.. حاول متخسرش النقاط دي؛ الحب
والاحترام والتقدير والاهتمام وعدم المكابرة، اللي مسألش وأنت واقع ميفرقش تسأل عليه وأنت واقف، غيابه كشف قيمتك عنده، وقتها خلي نفسك ذكي كفاية وتدي لنفسك حقها.
ابعد عن اللي بيصغرك قدام نفسك، اللي لازم يقلل منك عشان يبان، واللي ضحكته على حساب كرامتك، الناس دي لو فضلت معاهم هتنسى قيمتك أصلًا، ومتقفش تشرح أو تعاتب أو تبرر، العتاب للناس اللي غلطة واحدة وجعتهم أكتر ما وجعتك؛ لكن اللي ضيّعك بإيده لا يستاهل كلمة ولا نظرة واحدة.
أخيرًا.. بص حواليك كويس، واختار ناس تشبه قلبك، ناس تقرب مش تبعد، ناس ترفع مش تهد، ناس تحسسك إنك غالي مش تقنعك إنك ولا حاجة، اللي لما تسكت يحسوا بيك، اللي لو مشيت يوم يسألوا عليك اليوم اللي بعده.
الحياة قصيرة على الوجع والتقليل، احترامك لنفسك هو أول وأغلى علاقة في حياتك، ولو اضطريت تخسر أي حد علشان تحافظ عليها اخسر وأنت رافع راسك، لأن اللي باعك النهاردة، هيبيعك بكرة، واللي قدرك النهاردة هيبني معاك عمر كامل.
خليك قوي وخد القرار قبل ما ييجي يوم تقول: "يا ريتني مشيت من بدري".
الكاتبة والمحررة الإعلامية دينا المصري