روجينا عن تريند أقعدي إنتي: كنت خايفة البنت اللي معايا تضربني.. والبرنامج من 13 سنة

علقت الفنانة روجينا على مقطع الفيديو المنتشر لها على مواقع التواصل الاجتماعي من برنامج حيلهم بينهم للمقالب منذ 13 عامًا، مؤكدة أنها لم تعلم التريند إلا من أصدقائها.

وقالت روجينا خلال لقائها مع برنامج et بالعربي: أنا تفاجأت جدا بالتريند بتاع “أقعدي إنتي” وكنت مشغولة ومركزة في ورق مسلسل بعمله، ولقيت صحابي بيقولوا ليا أستني أقعدي قولتلهم إيه أقعدي دي؟ وفهمت بعدين لما المتابعين بعتوا ليا المقلب.

وواصلت روجينا: استغربت جدا لما عرفت إن حيلهم بينهم بقاله 13 سنة، وساعتها كنت خايفة جدا من البنت اللي معايا في البرنامج وكنت حاسة أنها هتقوم تضربني بالقلم وكنت بدافع عن نفسي وبقولها أقعدي إنتي؛ لأني خايفة، ودي مش أول مرة اتصدر التريند بسبب مشهد زي ما حصل قبل كدا في مسلسل البرنس وشخصية فدوى الشهيرة بـ كلمة “يا عمري”.

روجينا: سعيدة جدا برئاسة حسين فهمي لمهرجان القاهرة السينمائي

كما علقت روجينا، على قرارات الفنان حسين فهمي بشأن الدورة المقبلة لمهرجان القاهرة السينمائي، قائلة: سعيدة جدا برئاسة حسين فهمي للمهرجان؛ لأني حضرت رئاسته في الدورات السابقة وكان عامل شكل عظيم للمهرجان؛ لأنه خريج معهد السينما ومثقف وبيحب الفن، ومتأكدة إن الدورة المقبلة هتبقى شكلها لائق لاسم مصر وللفن، وبدعم قراراته بشأن ملابس الفنانات لأن جميع المهرجانات لها قواعد ولما بنروح أي مكان في العالم بنحترم القواعد الخاصة به ودا احترام للفن والمهرجان.