دموع الفرحة .. نيجار محمد تبكي بعد القبض على المتورط في النصب عليها |فيديو

خرجت الفنانة نيجار محمد، في فيديو عبر صفحتها الرسمية على فيسبوك، بكت خلاله فرحًا بعد القبض على مالك شركة التوريدات الذي نصب عليها، مما أدخلها في أزمات مادية على مدار عام.

وقالت نيجار محمد في الفيديو : “أنا صاحية بدري وده بالصدفة، دخلت لقيت إن أحمد اتقبض عليه وهيعمل معارضة استئنافية، ويارب أخلص علشان أخد حقي وأدفع جزء من الفلوس اللي عليا”.

وواصلت : “قسمًا بحياة أمي أنا كنت بعمل الفيديو اللي فات، وشايفة مفيش حد هيعمل حاجة والدنيا هتفضل بايظة عندي، وماكنتش متخيلة إن ربنا هيحلها، وبقالي فترة كبيرة في الموضوع ده”.

وأضافت نيجار موجهة الشكر لوزارة الداخلية : "أنا حقيقي متشكرة جدًا لوزارة الداخلية والحكومة، وأنا مش مصدقة إنه اتقبض عليه وكان بقالي سنة مش عارفة أقعد في كافيه مع حد، ومش مصدقة إن الحكومة حلتها بالسرعة دي، شكرًا لحكومة بلدي ولوزارة الداخلية".

وأكملت نيجار محمد : “عارفة إنه هيعمل معارضة وهيطلع منها، بس على الأقل لحقته قبل أما يهرب بره البلد ويعمل فيا حاجة، ودي أول مرة حد يجيبلي حقي وأول مرة ماتبهدلش علشان أجيب حقي أو حق ماما”.

وسبق واستغاثت نيجار محمد، في فيديو لها عبر فيسبوك، من تعرضها للنصب، حيث طالبت وزارة الداخلية ورجال الشرطة بمساعدتها، وقالت وقتها : “مش جاية أكلمكم في تريند، أنا بقالي سنة كاملة متبهدلة في المحاكم بسبب واحد نصب عليا، من الشيخ زايد”.

وأضافت : "لفيت كتير على المحاكم وبعد بهدلة خد حكم نهائي 3 شهور مش فاضل غير المعارضة الاستئناقية ولحد الآن ما اتقبضش عليه ووالده بيخبيه رغم أنه بيسهر وبيسافر".

وتابعت : " أصبحت مديونة بسببه ومش عارفة أجيب حقي، ,هددني وقال لي لو نزلتي حاجة عليا هيعمل لي قضية تشهير وبيهددني بوالدتي"، وواصلت نيجار محمد : "والده قالي هيسرفه الأردن أو يفضل تلات سنين لحد ما يسقط الحكم وناصب على ناس كتير وعليه أحكام من سنة 2021".

واختتمت نيجار: “أنا بناشد الداخلية وواثقة في شرطة بلدي لأنهم مش بيرضوا بالظلم”.