دكتورة دينا المصري تكتب: احمي حدودك

7 قواعد نفسية ترفع قيمتك فورًا في أي علاقة..

في الأول خليني أقولك الحقيقة اللي ناس كتير مش بتحب تسمعها: الناس مش بتعاملك على قد ما تستحق، الناس بتعاملك على قد ما بتسمح، إحنا بنحب نصدق إن نيتنا الطيبة كفاية عشان الناس تقدرنا، وإن لما ندي كتير هنلاقي احترام تلقائي، بس الحقيقة النفسية مختلفة شوية.

الناس مش بتتعامل مع اللي جواك، الناس بتتعامل مع حدودك، معاييرك، وطريقتك في إدارة نفسك، لو ماعندكش حدود واضحة، هتلاقي نفسك بتتصنف جوه أي علاقة حسب راحة ومصلحة الطرف التاني، وعشان كده مهم تفهم القواعد النفسية دي، عشان محدش يقدر يتجاوزك بسهولة.

أخطر حاجة ممكن تعملها في نفسك إنك تعيش بردّ الفعل مش بالفعل، تستنى الناس تقدّرك الأول،
تحترمك الأول، تهتم بيك الأول، وأنت أصلًا ما أعلنتش بسلوكك إنك أولوية في حياتك.

لما ترد فورًا وانت مشغول، لما تغيّر خططك بسهولة عشان ترضي غيرك، لما تكتم زعلك عشان “ما تزعلش حد”، أنت من غير ما تاخد بالك بتوصل رسالة واحدة: أنا سهل أعدّي حدودي.

الناس بتختبر حدودك؛ بس بهدوء، مش دايمًا بدافع سوء نية، لكن دي طبيعة بشرية، كل واحد بيحاول يفهم: “أنا ممكن أوصل لفين مع الشخص ده؟”، سكتّ عن أول تقليل؟، هييجي التاني، قبلت أول تأجيل من غير سبب؟ هيتكرر، عدّيت أول تجاهل؟، هيبقى أسلوب، وساعتها تبدأ الدايرة المتعبة: تدي أكتر تتقدّر أقل؛ فتحاول تدي أكتر فتتعب أكتر
لحد ما تستنزف.

قانون نفسي مهم جدًا: اللي بيتكرر من غير اعتراض بيتحول لقاعدة، لما ما تعترضش كأنك موافق، لما ما توضّحش كأنك فاتح الباب، الهيبة مش بتضيع مرة واحدة، هي بتتآكل حتة حتة في مواقف صغيرة بنعدّيها.

نقطة التحول الحقيقية بتبدأ لما: تبطل تشرح نفسك زيادة عن اللزوم، وتبطل تجري ورا الاهتمام، وتبطل تقلق الناس هتفهم هدوءك إزاي.

وتبدأ بدل كده: تدير وقتك بوعي، وتختار ردودك بهدوء، وتقول “لا” من غير خناق أو عدوان، وساعتها يحصل شيء غريب فعلًا: الناس تبدأ تعيد حساباتها معاك.

طبيعي إن ردود الفعل تختلف، في ناس هتستغرب، في ناس هتختبرك تاني، وفي ناس هتحاول تضغط عليك، بس السر كله في الثبات، مش المطلوب تبقى قاسي، المطلوب تبقى واضح ومتسق، ولما معاييرك تتغير: يا الناس ترتقي لمستواك، يا تختفي من حياتك، وفي الحالتين أنت كسبان.

أحلى نتيجة بتحصل جواك أنت؛ لما تحمي وقتك وحدودك، احترامك لنفسك بيعلى؛ ولما احترامك لنفسك يعلى، ده بيبان في: نبرة صوتك، وطريقة وقفتك، وقراراتك، وعلاقاتك كلها، أنت مش محتاج تقول إنك قوي؛ يكفي إنك تعيش بقوة.

المحتوى ده جزء من دليل عملي بعنوان: “قواعد الشخصية القوية”

دليل بيوضح خطوة بخطوة إزاي تبني حدودك، معاييرك، وصورتك عن نفسك بطريقة عملية تتترجم لحضور وهيبة حقيقية في حياتك.

ده مش كلام تحفيزي وخلاص، دي قواعد نفسية لو فهمتها بعمق، ممكن تغيّر مسار علاقاتك بالكامل.

الكاتبة والمحررة الإعلامية الدكتورة دينا المصري