دكتورة دينا المصري تكتب: أعراض انسحاب
التعلق مش حب، وأعراض الانسحاب مش ضعف، دي كيمياء مخك وهو بيصرخ، خليني أقولك الحقيقة اللي غايبة عنك:
التعلق بيبدأ غالبا على انه حب لكن مع الوقت بيتحول لاعتماد نفسي وعصبي على شخص واحد، مش علشان الشخص ساحر، ولا علشان أنت ضعيف؛ لكن علشان مخك اتعود على جرعة دوبامين ثابتة جاية من وجوده.
طيب يعني إيه دوبامين؟، الدوبامين ده ناقل عصبي مسئول عن الإحساس بالمتعة، والشغف، والتعلق، والترقب، واللهفة
يعني كل رسالة وكل مكالمة وكل حضن وكل اهتمام مفاجئ كان بيطلع دوبامين، فمخك قال: آه، يبقي ده مصدر الأمان والمتعة.
أعراض التعلق (ولو لقيت نفسك وصلت هنا إقرا اللي جاي بتركيز وعلى مهلك):
تفكير قهري فيه طول الوقت
مزاجك مربوط برده عليه
قلق لو اتأخر في الرد
تبرير أي غلط علشان متخسروش
إحساس إنك من غيره تايه
خوف مبالغ فيه من الفقد
بتستحمل اللي كنت رافضه زمان
وده مش حب صحي، ده تعلق عصبي نفسي، طيب ايه اللي بيحصل وقت الانسحاب؟، لما الشخص يبعد، أو العلاقة تخلص، أو يحصل قطع مفاجئ، الدوبامين بيقع فجأة، زي مدمن اتحرم من الجرعة، وعلشان كده بتظهر أعراض الانسحاب وأعراض الانسحاب من التعلق:
وجع في الصدر أو المعدة
قلق شديد
أرق أو نوم متقطع
نوبات بكاء بدون سبب
فقدان شغف
رغبة قوية في التواصل رغم الأذى
إحساس فراغ
تذبذب بين (وحشني) و (أنا أستاهل أحسن)
وأيوه؛ اللي بتحس بيه حقيقي جسديا يعني مش دراما ولا دلع، طيب ليه الأعراض دي صعبة؟، لأن مخك متبرمج يقولك: ارجعله علشان نرتاح، مش علشان العلاقة صح لكن علشان يرفع الدوبامين بسرعة، وهنا يبدأ الصراع بين عقلك الواعي ومخك العاطفي.
طيب نعمل إيه وإزاي نزود الدوبامين بطريقة صح؟
هتزود الدوبامين بس مش بحضن غلط ولا برسالة من شخص مؤذي لكن بطرق صحية بتعيد توازن المخ لأن فيه طرق علمية وبسيطة لرفع الدوبامين:
١. الحركة البدنية: المشي – الجيم – أي مجهود حتى ٢٠ دقيقة يوميا بتفرق جدا.
٢. التعرض للشمس: الشمس الصبح أو العصر بتنظم الدوبامين والسيروتونين.
٣. الإنجازات الصغيرة: تخلص حاجة بسيطة
زي إنك ترتب أوضتك أو تكتب تو دو ليست وتعمل منها حاجة واحدة.
٤. التواصل الآمن: حد يسمعك من غير حكم أو صحبة صح
او جلسة علاج نفسي.
٥. الأكل: بروتين كويس ومياه وتقليل سكر وكافيين لانهم بيعملوا ارتفاع وهمي وبعده سقوط.
٦. التعلم: يعني كل يوم معلومة جديدة وفيديو مفيد أو بودكاست أو أي حاجة تحسسك إنك بتتطور.
٧. قطع المحفزات: قلل استوكنج وقلل رسايل قديمة وقلل الموسيقى اللي بتفكرك بيه في الأول.
وخلي بالك لو إنت في مرحلة انسحاب فأنت مش ضعيف لكن أنت بتتعافى.
والتعلق بيتفك بس بالصبر؛ بالفهم؛ وبالدعم الصح؛ فاماتجلدش نفسك ولا تستعجل الشفاء ولا ترجع لمصدر الأذى علشان تهدى شوية، لأن الهدوء اللي بييجي من الرجوع بيكلفك نفسك بعدين.
الكاتبة والمحررة الإعلامية الدكتورة دينا المصري