كنت هموت .. هدى المفتي تروي لأول مرة تفاصيل أزمتها الصحية

قالت الفنانة هدى المفتي: "أنا من أول الناس اللي جالهم كورونا في مصر وبعدين خلصت الكورونا وبقينا كويسين ومأخدتش أدوية السيولة فبعدها بأكتر من شهر جالي جلطة في الوريد اللي بيوصل دم للأمعاء".

تفاصيل إصابة هدى المفتي بالجلطة

وأضافت خلال لقائها ببرنامج "معكم" الذي تقدمه الإعلامية منى الشاذلي بقناة "سي بي سي": "مكنتش أعرف أني أصبت بالجلطة وكنت بحس بحرقان وحاجات غريبة بتحصل، وكنت معتقدة أن فيه مشكلة في القلب عندي وعملنا رسم قلب طلع مفيش حاجة، وفي رأس السنة كنا رايحين أسوان وفجأة تعبت تعب مؤلم ووجع صعب فرجعت بطيارة وقطعت الإجازة واتبهدلت، ولولا صديقتي كنت هتعب جدًّا، وعلقولي محاليل في مركب".

وعكة صحية خطيرة لهدى المفتي

وتابعت: "لما رجعت القاهرة دخلت المستشفى الدكاترة مكنوش عارفين يشخصوا حالتي وبطني كانت عمالة تتنفخ ووجع مميت مش آدمي، فاضطروا أنهم يفتحوا بطني وقتها اكتشفوا أن عندي جلطة في الوريد اللي بيوصل دمع للأمعاء، ولما متعالجش بسرعة عمل غرغرينا في جزء من الأمعاء، وتم استئصال جزء من الأمعاء، وكانت عملية جراحية كبيرة، وقعدت في العناية المركزة أكتر من شهر وممنوع الزيارة والأكل والمياه لمدة 24 يوم، واتبهدلت أوي، وكانت تجربة وحشة ومن الحاجات اللى اتعلمت منها، وبعدها علاقتي بربنا اتحسنت بعد الوعكة الصحية".

وأكملت: "مكنتش متخيلة أني هطلع من الأزمة الصحية على خير، ومن الأدوية اللى كنت باخدها كنت بنسى الناس اللى حواليا".