اعترافات صادمة للمتهمة بالجمع بين زوجين في المقطم | مستندات

ننشر نص التحقيقات الكاملة في قضية اتهام ربة منزل في المقطم بالجمع بين زوجين والتي أجرتها النيابة العامة.

وجاء في نص أقوال المتهمة الثانية وتدعي نفيسة. ح "29 سنة "

س: ما قولك فيما هو منسوب إليك من أنك متهمة بارتكاب جريمة الزنا بالاشتراك مع المتهم عبد المنصف. أ ؟

ج: الكلام ده محصلش

س: ما الذي حدث إذن وما هى ظروف ضبطك واحضارك وعرضك علينا؟

ج: اللي حصل ان حصل خلافات بيني وبين اخوات زوجي وبعد كده سبت الأقصر في شهر فبراير اللي فات علشان ابعد عنه وجيت القاهرة اقعد عند اختي ام هاشم بمساكن المقطم ولما كنت قاعدة عندها قالتلي هي وجوزها شحات ان جوزي عبد النبي طلقني وطلعولي قسيمة طلاق ووروهالي وبس انا مش بعرف اقرا ولا اكتب وبعدين قالولي مين هيخلي باله منك ومن عيالك ويصرف عليكو وقالولي اتجوز عبد المنصف علشان ياخد باله مني ومن عيالي وبعد كده اجرلي شقة في بلوك 178 مساكن العبد وفي شهر يونيو اللي فات قابلت عبد النبي في رمسيس واعطاني فلوس وطلعت معاه فندق ومش فااكرة اسمه وساعتها عاشرني معاشرة الازواج وبعد كده سبته ورجعت عند اختي وامبارح اتفاجئت بعبد النبي بيخبط علي بابا الشقة بس انا مكنتش اعرف انه هو اللي بيخبط مردتش افتحله ولما كلمت اختي قالتلي صوتي ولمي عليه الناس وبعد كده لقيت الحكومة بتخبط علي الباب ففتحتلهم ونزلت وروحت معاهم علي بيت اختي وبعد كده اهدوني انا ومنصف بعد ما جاب عقدين الجواز العرفي اللي احنا كاتبينهم وودونا القسم.

س: متي واين حدث ذلك؟

ج: الكلام ده حصل بتاريخ 22 يوليو 2022 الساعه 2 صباحا في المقطم

س: من كان برفقتك انذاك؟

ج: انا كنت في الشقة لوحدي ومعايا ولادي الاثنين واسمهم عمر وحمدي

س: ما تعليلك بالقبض عليك؟

ج: انا معرفش هم قبضوا عليا ليه

س: متي حدثت واقعة طلاقك من المدعو عبد النبي؟

ج: اختي وجوزها وروني قسيمة الطلاق في شهر فبراير اللي فات

س: من هو القائم علي ابلاغك بها تحديدا؟

ج: اختي وجوزها

س: هل من ثمة شهادة قيد طلاق لديك؟

ج: انا معرفش مين الشهود

س: هل تقابلك مع زوجك الاول عبد النبي؟

ج: ايوة انا قابلته في شهر يونيو اللي فات

س: هل قام سالف الذكر بمعاشرتك معاشرة الازواج عقب علمك بطلاقه لك ؟

ج: ايوة

س: ومتي واين حدث ذلك؟

ج: الكلام ده حصل في شهر يونيه اللي فات في فندق رمسيس معرفش اسمه

س: ما تعليلك لقيامك بذلك وانت علي علم بطلاقه لك؟

ج: علشان اختي وجوزها اجبروني علي كده

س: ما الذي اخبرك به كلا من شقيقتك وزوجها؟

ج: هما قالولي روحي قابلي عبد النبي لما اتصل بيا اروح اشوفه

س: متي واين قمت بالزواج من المدعو عبد المنصف

س: انا اتجوزته في شهر فبراير اللي فات

س: اين كنت تقيمين فترة زواجك من عبد المنصف

ج: عبد المنصف اجرلي شقة اللي انا عايشة فيها دلوقتي

س: وما هي ظروف تقابلك مع عبد المنصف؟

ج: انا اعرفه علشان هو قريب عبد النبي وانا كنت قاعدةو مع عبد النبي في الاقصر

س: وهل قام زوجد عبد النبي بتطليقك؟

ج: ايوة

س: وهل الطلاق باذن ام رجعي؟

ج/ باذن

س: وهل تم الطلاق رسميا علي يد ماذون؟

ج: ايوة كان رسمي علي يد ماذون

س: وهل قام زوجك عبد النبي بردك؟

ج: ايوة

س: وهل تم الرد رسميا علي يد ماذون؟

ج: ايوة هو ردني رسمي عند ماذون

 

وتلقت غرفة عمليات شرطة النجدة بلاغًا من عامل يفيد بضبط زوجته في أحضان عشيقها داخل شقة مستأجرة في منطقة المقطم، وانتقل رجال المباحث لمكان الواقعة.

 

وتحفظ رجال المباحث على ربة منزل وعشيقها، وبسؤال المبلغ أفاد أنه ضبط زوجته داخل شقة مستأجرة بدائرة القسم.

 

وبمواجهة ربة منزل وعشيقها، قالت الأولى: “مش عشيقي أنا متجوزاه عرفي”، وتم اقتياد المتهمين إلى ديوان القسم وتحرر محضر بالواقعة وتولت النيابة العامة التحقيق التى أمرت بحبسهما 4 أيام على ذمة التحقيقات.