محمد نجاتي: زمان ماكانش في محسوبية بالوسط الفني.. ولازم تكوّن علاقات عشان تعرف تشتغل

كشف الفنان محمد نجاتي، رأيه فيما اختلف في صناعة الفن قديمًا عن الفترة الحالية، مشيرًا إلى أن الصناعة لم تختلف كثيرًا عن ذي قبل، لكن الفنان أصبح في حاجة لتكوين علاقات كثيرة إلى جانب الموهبة.

وقال نجاتي:  مفيش حاجة اختلفت من زمان عن دلوقت، لكن الفنان أصبح في حاجة لتكوين علاقات أكتر، زمان كان فيه إنصاف للمواضيع والأدوار كانت بتتوزع بشكل أعدل وما كانش فيه محسوبيات، حاليًا محتاجة علاقات إلى جانب موهبة التمثيل، فالممثل لازم يكون عنده علاقات عشان يشتغل أكتر.

في سياق متصل، قال نجاتي إنه يضطر في بعض الأحيان لقبول بعض الأعمال الفنية من أجل الأموال، مشيرًا إلى أنه من الصعب أن ينتظر العمل الجيد كل عامين في ظل الأجور السيئة، ولكنه يقبل أحيانًا أعمالًا حتى يستطيع أن يكمل حياته والتزاماته، مضيفًا: أنا ممثل محترف وما عنديش مهنة تانية.. أنا عضو عامل في نقابة المهن التمثيلة لو قعدت أستنى سنتين عشان أعمل عمل مهم في ظل الأجور القليلة مش هشتغل وولادي عاوزين مصاريف أقول لهم إيه مستني العمل المهم.

ومن ناحية أخرى، أكد نجاتي خلال لقائه: مفيش حد يقدر ينجح ويستمر بالواسطة، ممكن تاخد فرصة بالواسطة لكن عمر ما هتنجح مهمها كانت الفرصة قوية إلا بحب الجمهور والموهبة الحقيقية، مضيفًا: سهل الواحد ياخد فرصة، لكن هل يقدر يكمل إلا إذا عنده موهبة حقيقية.